लक्ष्मीपुर पतारीमा ४० वर्षीय महिलाको शव खोलाकिनारमा भेटियो

• असार २५, २०८३ | २८२ पटक पढिएको | सीमा संदेश

सिरहा। सिरहाको लक्ष्मीपुर पतारीमा एक महिलाको शव फेला परेको छ। लक्ष्मीपुर पतारी–३ महेशपुरकी ४० वर्षीया रञ्जुदेवी यादवको शव सोही पालिकाको वडा नम्बर ५ र ६ जोड्ने सरस्वती खोलाको उत्तरी किनारमा फेला परेको हो।

स्थानीय अजय यादवले भैँसी चराउने क्रममा शव देखेपछि उनका आफन्त र प्रहरीलाई खबर गरेका थिए। खबरपछि पुगेका प्रहरीले घटनाको मुचुल्का गरी पोस्टमार्टमका लागि रामकुमार उमाप्रसाद स्मारक अस्पताल, लहान पठाएको छ।

मृतकका बुबा हरिदेव यादवले रञ्जुलाई मानसिक समस्या रहेकाले केही समयदेखि माइतीमै बस्दै आएको बताए। उनले मानसिक समस्या रहेकाले उनको घरमा बस्ने, हिँड्नेसमेत ठेगान नहुने बताए। उनको माइती पनि लक्ष्मीपुर पतारी–५ पथलगडामा हो।

मृत्युको कारण भने खुल्न नसकेको प्रहरीले जनाएको छ। घटनाबारे तत्काल केही बताउन नसकिने भन्दै थप अनुसन्धान जारी रहेको प्रहरीले जनाएको छ।