२६ दिनपछि सोनम वाङचुकले तोडे अनशन

• साउन ८, २०८३ | १६३ पटक पढिएको | सीमा संदेश

भारतीय सामाजिक अभियन्ता सोनम वाङचुकले २६ दिन लामो अनशन अन्त्य गरेका छन्।

उनले सामाजिक सञ्जाल एक्समार्फत जानकारी दिँदै केन्द्रीय मन्त्री जेपी नड्डा, डा. जितेन्द्र सिंह तथा लेह–लद्दाखको एपेक्स बडीका वरिष्ठ नेताहरूको उपस्थितिमा आफूले अनशन तोडेको बताएका हुन्।

वाङचुकका अनुसार यसअघि विभिन्न राजनीतिक दलका ६५ सांसदहरूले पत्र लेखेर उनलाई अनशन अन्त्य गर्न आग्रह गरेका थिए।

उनले लामो छलफलपछि केही सर्तहरूमा सहमति बनेको र देशमा सम्भावित हिंसाको जोखिमलाई मध्यनजर गर्दै अनशन अन्त्य गर्ने निर्णय लिएको बताएका छन्।

वाङचुकले ती सर्तबारे आफूले छिट्टै छुट्टै भिडियोमार्फत विस्तृत जानकारी दिने उल्लेख गर्दै देशभर कुनै पनि प्रकारको हिंसा हुन नदिन सबैलाई संयमित र सतर्क रहन आग्रह गरेका छन्।

नीट–यूजी प्रश्नपत्र चुहावट प्रकरणको विरोधमा विद्यार्थीहरू विगत एक महिनादेखि नयाँ दिल्लीको जन्तर–मन्तरमा प्रदर्शन गरिरहेका छन्।

प्रदर्शनकारीहरूले केन्द्रीय शिक्षा मन्त्री धर्मेन्द्र प्रधानको राजीनामा माग गर्दै आएका छन्। यही मागको समर्थनमा सोनम वाङचुक विगत २६ दिनदेखि आमरण अनशनमा बसेका थिए।