सखुवानन्कारकट्टीमा कटुवा पेस्तोल बरामद, काठमाडौंमा एकजना पक्राउ

• साउन २२, २०८३ | १४८ पटक पढिएको | सीमा संदेश

प्रहरीले सिराहाको सखुवानन्कारकट्टी गाउँपालिका–  ५, महेशवारी टोलबाट कटुवा पेस्तोल बरामद गरेको छ । जिल्ला प्रहरी कार्यालय सिराहाका अनुसार राति करिब सवा ९ बजेतिर १८ वर्षका मोहम्मद अफरोज राइनले घरमा कटुवा पेस्तोल लुकाएर राखेको भन्ने विशेष सूचनाको आधारमा खानतलासी गर्दा कटुवा पेस्तोल बरामद भएको हो।

इलाका प्रहरी कार्यालय लहानबाट प्रहरी निरीक्षकको कमान्डमा खटिएको टोलीले घर खानतलासी गर्दा कटुवा पेस्तोल बरामद भएको सिराहा प्रहरीका सूचना अधिकारी प्रहरी नायब उपरीक्षक रमेशबहादुर पालले जानकारी दिए। उनका अनुसार पेस्तोल इलाका प्रहरी कार्यालय लहानमा ल्याई थप अनुसन्धान भइरहेको छ।

राइन काठमाडौं महानगरपालिका–  ३२, तीनकुनेस्थित २०२० ब्वाइज होस्टलमा बसिरहेको भन्ने जानकारीको आधारमा काठमाडौं प्रहरी वृत्त बानेश्वरसँग समन्वय गरी उनलाई नियन्त्रणमा लिई थप अनुसन्धानका लागि इलाका प्रहरी कार्यालय लहान ल्याउने कार्य भइरहेको प्रहरीले जनाएको छ ।