बाबा रामदेवलाई कंगनाको चेतावनी: मेरो जवानी र बेडरुमको सपना नदेख्नुस्

• भदौ ६, २०८३ | १०८ पटक पढिएको | सीमा संदेश

बलिउड अभिनेत्री तथा भारतीय जनता पार्टीकी सांसद कंगना रनौत र योगगुरु बाबा रामदेवबीच सामाजिक सञ्जालमा तीखो वाक्युद्ध सुरु भएको छ। कंगनाको विवादास्पद अभिव्यक्तिमाथि रामदेवले टिप्पणी गरेपछि कंगनाले इन्स्टाग्राममार्फत उनलाई कडा जवाफ दिएकी हुन्।  

कंगनाले रामदेवको टिप्पणीप्रति आक्रोश व्यक्त गर्दै आफ्नो जवानी र निजी जीवनबारे टिप्पणी नगर्न चेतावनी दिएकी छन्। उनले आफूलाई चरित्रको पाठ नपढाउनसमेत रामदेवलाई आग्रह गरेकी छन्।

विवाद कंगनाले केही युवा प्रदर्शनकारीलाई लक्षित गर्दै गरेको ‘जेनेरेसन गटर’ टिप्पणीबाट सुरु भएको थियो। आलोचना भएपछि उनले आफूले सबै युवालाई नभई आफूलाई ‘कक्रोच’ भन्ने केही व्यक्तिलाई मात्र लक्षित गरेको स्पष्टीकरण दिएकी थिइन्।

यही अभिव्यक्तिको आलोचना गर्दै रामदेवले कंगनाको विगत र युवावस्थासँग जोडेर टिप्पणी गरेपछि अभिनेत्रीले सामाजिक सञ्जालमार्फत प्रतिवाद गरेकी हुन्।

कंगनाले आफ्नो जवाफमा रामदेवको विगतबारे समेत संकेत गर्दै आफूलाई चरित्रको पाठ नपढाउन भनेकी छन्। उनले आफ्नो चरित्रमाथि प्रश्न उठाउने आधार नभएको दाबी गर्दै रामदेवको टिप्पणीलाई व्यक्तिगत आक्रमणका रूपमा लिएको संकेत गरेकी छन्।

यस क्रममा कंगनाले सन् २०२४ को पतञ्जलि आयुर्वेदसम्बन्धी मुद्दासमेत स्मरण गराएकी छन्। भ्रामक विज्ञापनसम्बन्धी उक्त मुद्दामा बाबा रामदेव र आचार्य बालकृष्णले भारतीय सर्वोच्च अदालतमा लिखित रूपमा माफी मागेका थिए।

उनीहरूले भविष्यमा भ्रामक औषधीय दाबी नगर्ने तथा आधुनिक चिकित्सा प्रणालीविरुद्ध अपमानजनक टिप्पणी नगर्ने प्रतिबद्धता जनाएका थिए।

यस घटनाले कंगना र रामदेवबीचको विवादलाई केवल कंगनाको अभिव्यक्तिको आलोचनामा सीमित नराखी दुवै पक्षबाट एकअर्काको सार्वजनिक छवि, विगत र व्यक्तिगत विषयसम्म पुगेको छ।