ताप्लेजुङ गोल्डकपको फाइनलमा सलहेस

• भदौ १७, २०८३ | ८३ पटक पढिएको | सीमा संदेश

मङ्गलबार भएको पहिलो सेमिफाइनल खेलमा जित निकाल्दै सिराहाको सलहेस युथ क्लब अन्तर्राष्ट्रिय आमन्त्रण चौथो ताप्लेजुङ गोल्डकप फुटबल प्रतियोगिताको फाइनलमा पुगेको छ ।

भारतको जर्जियन युनाइटेड फुटबल क्लब कालिङ्पोङलाई २–० गोलअन्तरले पराजित गर्दै सलहेस फाइनलमा पुगेको हो ।

खेलको मध्यान्तरसम्म दुवै टोलीले गोलरसहित बराबरी खेलेका थिए । मध्यान्तरपछि भने खेलको ६२ औं मिनेटमा सलहेसका निसकुमार श्रेष्ठले गोल गर्दै आफ्नो टोलीलाई अग्रता दिलाउनुभएको थियो । खेलको ७२ औं मिनेटमा सलहेसका फागुराम थारुले गोल गर्दै टिमलाई बलियो बनाउनुभयो । 

जर्जियन युनाइटेडका तर्फबाट गोल गर्ने अधिकतम् प्रयास गरे पनि असफल रह्यो ।

खेल अवधिभर जर्जियन युनाइटेडका तर्फबाट गोल हुन नसकेपछि सलहेसको जितका लागि दुई गोल पर्याप्त बन्यो । सलहेस युथ क्लब साविक विजेतासमेत हो । मङ्गलबारको खेलमा सलहेसका खेलाडी फागुराम थारु म्यान अफ दि म्याच बन्नुभएको छ ।

आयोजक लाखेजात्रा सञ्चालन समितिका अनुसार बुधबार अन्तिम सेमिफाइनल खेल पाँचथरको फिदिम स्पोर्टिङ क्लब र झापा ११ फुटबल क्लबबिच हुनेछ । प्रतियोगिताको फाइनल खेल भदौ १९ गते हुनेछ ।

प्रतियोगिताको विजेताले सात लाख दुई हजार ८३ रुपियाँ र उपविजेताले तीन लाख ५२ हजार ८३ रुपियाँ नगद पुरस्कारसहित ट्रफी, पदक र प्रमाणपत्र पाउने छ । 

आयोजक समितिका अध्यक्ष सागर मादेनका अनुसार प्रतियोगितामा सर्वोत्कृष्ट हुने खेलाडीले मोटरसाइकल पुरस्कार पाउनेछन् ।

त्यस्तै, टिकट काटेर खेल हेर्ने एकजना भाग्यशाली दर्शकलाई उपहारस्वरूप स्कुटर प्रदान गरिने अध्यक्ष मादेनले जानकारी दिनुभयो । प्रतियोगिता फुङ्लिङस्थित भानुजन माध्यमिक विद्यालयको खेल मैदानमा सञ्चालन भइरहेको छ ।