अमेरिकी सहरमा ‘बिगफुट’ देखिएपछि मच्चिएको हल्लीखल्लीको यस्तो रहस्य खुल्यो

• भदौ २६, २०८३ | ११५ पटक पढिएको | सीमा संदेश

अमेरिकाको मेन राज्यस्थित एउटा सहरमा रहस्यमय जीव ‘बिगफुट’ देखिएको भन्दै स्थानीय बासिन्दाबीच केही दिनसम्म चर्चा र त्रास फैलियो। विभिन्न व्यक्तिबाट लगातार त्यस्तो जीव देखिएको सूचना आएपछि प्रहरीले समेत घटनालाई गम्भीरतापूर्वक लिएर अनुसन्धान थालेको थियो।

डामारिस्कोटा क्षेत्रमा बिगफुट देखिएको भन्दै प्रहरीकहाँ असामान्य रूपमा धेरै फोन आएपछि स्थानीय प्रहरी सक्रिय भएको थियो। सामाजिक सञ्जालमार्फत समेत यसबारे सूचना सार्वजनिक भएपछि घटनाले थप चर्चा पाएको थियो।

अनुसन्धानका क्रममा भने स्थानीयवासीले देखेको भनिएको बिगफुट कुनै रहस्यमय जीव नभएको खुलेको छ। प्रहरीले खोजी गर्दै जाँदा मानिसले लगाउने विशेष पोसाकमा सजिएको एक व्यक्तिलाई फेला पारेको थियो।

प्रहरीका अनुसार उक्त पोसाक सामान्य भेषभूषाजस्तो थिएन। निकै वास्तविक देखिने गरी तयार पारिएको पोसाकका कारण टाढाबाट हेर्दा मानिसलाई वास्तविक बिगफुट नै सहरमा घुमिरहेको जस्तो लागेको थियो।

घटना वास्तविक नभएको खुलेपछि बिगफुटको खोजीमा लागेका स्थानीयवासी केही निराश भए पनि प्रहरीले घटनाको अर्को सकारात्मक पक्ष औंल्याएको छ। रहस्यमय जीव देखिएको खबर फैलिएपछि स्थानीय मानिसहरू एकअर्काको सुरक्षा र अवस्थाबारे चासो राख्दै सहयोगका लागि अघि सरेका थिए।

प्रहरीले वास्तविक बिगफुट फेला पार्न नसके पनि घटनाले समुदायबीचको सहकार्य र एकअर्काप्रतिको जिम्मेवारी देखाएको जनाएको छ।

बिगफुट उत्तर अमेरिकाको लोककथामा वर्णन गरिने मानिसजस्तै देखिने कथित विशाल जीव हो। लामो समयदेखि यसलाई जंगल तथा दुर्गम क्षेत्रमा देखिएको दाबी गरिँदै आए पनि यसको अस्तित्व पुष्टि गर्ने वैज्ञानिक प्रमाण भने अहिलेसम्म भेटिएको छैन।