सिरहा : होलीमा उछृंखल गतिविधि गरेको आरोपमा ११ जना पक्राउ,२१७ सवारी होल्ड

• चैत ४, २०७८ | ६८७ पटक पढिएको | सीमा संदेश

सिरहा । शुक्रवार फागु पूर्णिमा मनाउने क्रममा उछृंखल गतिविधि गरेको आरोपमा सिरहाबाट ११ जना पक्राउ परेका छन् ।

सिरहाको सिरहा नगरपालिका, विष्णुपुर, चौर्हवा,मिर्चैया, गोलवार, धनगढी, जिरोमाईल, लहान, कर्जन्हा, बन्दीपुर लगायतको क्षेत्रबाट उनीहरुलाई पक्राउ गरिएको जिल्ला प्रहरी कार्यालय सिरहाका प्रहरी प्रवक्ता एवम प्रहरी नायव उपरिक्षक सुभाष बुढाथोकीले राजधानीपाटीलाई बताए ।

उनका अनुसार सबैभन्दा बढी  भिड हुने स्थान लहान, गोलबजार, मिर्चैया क्षेत्रबाट होलीमा उछृंखल गतिविधि गरेको आरोपमा पक्राउ परेका छन् । पक्राउ परेकामध्ये अधिकांशले मादक पदार्थ सेवन गरेर उछृंखल गतिविधि गरेको प्रहरी प्रवक्ता एवम प्रहरी नायव उपरिक्षक सुभाष बुढाथोकीले बताए । उनले भने, ‘अन्य व्यक्तिलाई अनावश्यकरुपमा दुःख हैरानी दिने पनि पक्राउ परेका छन्, सबैलाई स्क्रीनिङ गरेर कसूर अनुसार छाड्ने वा मुद्दा चलाउने टुंगो लाग्छ ।’

यसैबीच, शुक्रबार बिहानदेखि साँझ ६ बजेसम्म २१७ सवारी साधन जिल्ला भरी होल्ड गरिएको छ । ‘बिना हेल्मेट हिँड्ने, तीन जना चढ्ने, लापरबाही तरिकाले सवारी चलाउने लगायतका सवारी नियम उल्लंघन गरेको पाइएपछि उनीहरुलाई कारबाही गरिएको हो’ डिएसपी बुढाथोकीले भने ।