कुकुर आतंकबाट ७२६ जना घाइते

• भदौ १८, २०८२ | ५११ पटक पढिएको | सीमा संदेश

रौतहटमा पछिल्लो समय कुकुर आतंकबाट सयौँजना घाइते भएका छन् । जिल्लाको चन्द्रपुर, वृन्दावन, गुजरा र फतुवा विजयपुर नगर क्षेत्रमा कुकुरको टोकाइबाट घाइते हुनेको संख्यामा वृद्धि हुँदै गएको छ ।

चन्द्रनिगाहपुरस्थित सरकारी अस्पतालका तथ्यांकमा देखिए अनुसार गत वैशाखयता मात्रै ७२६ जना कुकुरको टोकाइबाट घाइते भएका छन्। अस्पताल प्रमुख डा. अभिनन्दन कुमार श्रीवास्तवका अनुसार वैशाखमा १४३, जेठमा १२२, असारमा १६६, साउनमा १६० र भदौको १५ गतेसम्म १३५ जना घाइते भएर अस्पताल आएका छन्।

घाइते सबै उमेर समूहका छन्। उनीहरूलाई रेबिजविरुद्धको खोप लगाइएको उनले बताए । चन्द्रनिगाहपुर– ४ का रामबाबु महतोले मन्दिरतर्फ जाँदै गर्दा कुकुरले आक्रमण गरी दुई पटक टोकेको बताए । चन्द्रनिगाहपुर–५ की सीतादेवी दासले बच्चा लिएर बाहिर निस्कनै कठिन भएको बताउँदै तत्काल नियन्त्रणको माग गरिन्।

स्थानीय समाजसेवी बसन्त आचार्यले पालिकाहरूले तत्काल टोली बनाएर नियन्त्रणका उपाय शुरु गर्नुपर्ने बताए । अहिले सहरदेखि गाउँसम्म छाडा कुकुरको संख्या ह्वात्तै बढेको छ । चन्द्रनिगाहपुरस्थित सरकारी अस्पतालका प्रमुख डा. श्रीवास्तवका अनुसार गर्मी मौसम, प्रजनन अवधि र मनसुन सक्रिय हुने बेला कुकुर बढी आक्रामक बन्ने भएकाले यस्तो अवस्था देखिएको छ ।

उनले गर्मीमा कुकुरहरू चिडचिडा हुने प्रवृत्ति देखिन्छ भने प्रजनन अवधिमा स्वभाविक रूपमा आक्रामक बन्ने सम्भावना बढी हुने गरेको बताए । उनले अनावश्यक रूपमा बाहिर नहिँड्न, अपरिचित कुकुरबाट टाढा रहन र विशेष सावधानी अपनाउन आग्रह समेत गरे ।