विष्णुपुरमा धानखेतमा महिलाको शव फेला

• असोज १३, २०८२ | २६४ पटक पढिएको | सीमा संदेश

 विष्णुपुर गाउँपालिका २ स्थित आफ्नो धानखेतको आलीमा घाँस काट्न गएकी स्थानीय महिलाको शव भेटिएको छ । वस्तुभाउलाई खुवाउने घाँस काट्न आइतबार अपराह्न विष्णुपुर गाउँपालिका-२, रजोखरमा रहेको घरबाट निस्किएकी स्थानीय नन्दा यादवकी श्रीमती करिब ५५ वर्षीया रामदुलारी यादव आफ्नै धानखेतमा मृत अवस्थामा भेटिएकी हुन् ।

विष्णुपुर गाउँपालिका-२, राधानगर क्षेत्रको धान खेतमा सोमबार बिहान महिलाको शव भेटिएको जानकारी पाएलगत्तै विष्णुपुरस्थित इलाका प्रहरी कार्यालयबाट प्रहरी टोली घटनास्थलमा पुगेर घटनास्थल मुचुल्कासहित स्थानीयसँग सोधपुछ गरी कानुनी प्रक्रिया पुर्याएर शव पोस्टमार्टमका लागि सिराहा प्रादेशिक अस्पताल पठाइएको जिल्ला प्रहरी कार्यालय सिराहाले जनाएको छ । 

सिराहा प्रहरी प्रमुख प्रहरी उपरीक्षक अनन्तराम शर्माले महिलाको शव भेटिएको जानकारी पाएपछि आफू पनि घटनास्थल पुगेर फर्किएको बताए । ‘घटनाको विस्तृत अनुसन्धान र पोस्टमार्टम गरेर रिपोर्ट आएपछि मात्र केही भन्न सकिन्छ,’ नयाँ पत्रिकासँग उनले भने । घाँस काट्न गएकी यादव आइतबार राति अबेरसम्म घर नफर्किएपछि घरका सदस्यहरूले राति अबेरसम्म खोजतलास गरेको स्थानीयले बताए । 

गाउँदेखि पश्चिमतर्फ आफ्नै धानखेततिर गएको हुन सक्ने अनुमानको आधारमा त्यतातिर खोज्ने क्रममा आलीमा केही घाँस काटेर राखेको र आलीमुनि धान माडेर कोल्टे अवस्थामा शव भेटिएको प्रहरीले जनाएको छ ।