सारस्वरमा भुक्तानीको विषयमा झडप, ६ जना घाइते

• चैत ८, २०८२ | १६३ पटक पढिएको | सीमा संदेश

सिरहामा मोटरसाइकल मर्मत गरेको रकमको भुक्तानीको विषयलाई लिएर दुई समूहबीच झडप भएको छ ।

सिरहा नगरपालिका–१२ स्थित सारसर क्षेत्रमा मोटरसाइकल मर्मत गरेको पैसा नतिरेको विषयमा विवाद हुँदा दुई समूहबीच झडप भएको छ । जिल्ला प्रहरी कार्यालय सिरहाका अनुसार उक्त झडपमा ६ जना घाइते भएका छन् ।

स्थानीय सलमान मियाँ र हासिम दफाली पक्षबीच विवाद चर्किएपछि घटनाले ठूलो रुप लिएको सिरहा प्रहरीले जनाएको छ । उक्त घटना भएको जानकारी प्राप्त हुनासाथ प्रहरी निरीक्षक गजेन्द्र नारायण रायको कमाण्डमा टोली खटिएर अवस्था नियन्त्रणमा लिएको सिरहा प्रहरीले जनाएको छ ।

उक्त कुटपिटमा परी सलमान पक्षका ४ जना घाइते भएका छन् भने हासिम पक्षका दुई जना घाइते भएको जिल्ला प्रहरी कार्यालय सिरहाका प्रवक्ता डीएसपी रमेशबहादुर पालले जानकारी दिए । सलमानपक्षका घाइते हुनेमा अन्दाजी ४० वर्षीया भुटनी खातुनको टाउको र दाहिने हातमा मध्यम चोट लागेको छ । त्यस्तै ३५ वर्षीय रहमद दफालीको टाउको र दाहिने हातमा चोट लागेको छ ।

त्यसैगरि ५८ वर्षीय इरफान मियाँको टाउको, दाहिने हात र गर्दनमा मध्यम चोट लागेको छ भने २६ वर्षीय लालबाबु मियाँको टाउको र दाहिने हातमा चोट लागेको सिरहा प्रहरीले जनाएको छ । त्यस्तै हासिम पक्षका घाइते हुनेमा १९ वर्षीय अरमान हुसेनको टाउकोमा मध्यम चोट लागेको छ भने आरिफ दफालीको बायाँ हातमा चोट लागेको रहेको डीएसपी रमेशबहादुरले बताए ।

घाइतेमध्ये भुटी खातुनलाई थप उपचारका लागि विराटनगर पठाइएको छ भने अन्य घाइते सबैलाई प्रादेशिक अस्पताल सिरहामा भर्ना गरिएको छ । यता प्रहरीले घटनामा संलग्न व्यक्तिहरूलाई नियन्त्रणमा लिइ थप अनुसन्धान भइरहेको जनाइएको छ ।