अर्नमा गाउँपालिकाले आफ्नै बजेटमा चार किलोमिटर कालोपत्र सडक शिलान्यास

• जेठ १, २०८३ | २३६ पटक पढिएको | सीमा संदेश

अर्नमा । अर्नमा गाउँपालिकाले आफ्नै बजेटमा चार किलोमिटर कालोपत्र सडक निर्माण गर्ने भएको छ ।गाउँपालिकाले प्रशासकीय भवनदेखि गोतहा–कृष्णपुर–५ को कार्यालय हुँदै हुलाकी सडकसम्म कालोपत्र सडक निर्माण गर्न लागेको हो ।

३० फुट चौडाइ र ४ किलोमिटर लम्बाइको यो सडक आगामी दुई वर्षभित्र निर्माण हुने गाउँपालिकाले जनाएको छ । गाउँपालिकाले यो सडक निर्माणका लागि वल्र्डवाइड इन्द्रेणी जेभी निर्माण कम्पनीसँग भ्याटसहित १० करोड २५ लाख ३७ हजार २ सय ८६ रुपैयाँमा ठेक्का सम्झौता गरेको छ ।

गाउँपालिका अध्यक्ष अशोक यादवले बिहीबार शिलान्यास गर्दै सडक समयमै निर्माण हुने र यो सडक बनेपछि यस भेगका २० हजार बढी नागरिक लाभान्वित हुने बताए । ’हामीकहाँ योजना ठेक्का लाग्ने तर काम नहुने प्रवृत्ति छ,’ उनले भने, ’तर, यो सडक हामी जसरी पनि समयमै बनाउँछौं।’

स्थानीयवासीले लामो समयदेखि उक्त सडक कालोपत्रे हुनुपर्ने माग गर्दै आएका थिए। वर्षायाममा हिलो तथा गर्मी मौसममा धुलोका कारण आवतजावतमा समस्या हुँदै आएको थियो। सडक निर्माणपछि गाउँपालिकाको प्रशासनिक केन्द्र, विद्यालय, वडा कार्यालय तथा विभिन्न बस्तीबीचको दूरी छोटिने विश्वास स्थानीयले व्यक्त गरेका छन्।

गाउँपालिकाका जनप्रतिनिधिहरूले यो योजना केवल सडक निर्माणमा सीमित नभई समग्र ग्रामीण विकाससँग जोडिएको बताएका छन्। सडक विस्तारपछि कृषि उत्पादन ढुवानी, विद्यार्थीको विद्यालय पहुँच, स्वास्थ्य सेवामा पहुँच तथा स्थानीय व्यापार–व्यवसायमा सकारात्मक प्रभाव पर्ने अपेक्षा गरिएको छ।

स्थानीय तहले विकास निर्माणका ठूला आयोजनालाई प्राथमिकतामा राख्दै काम अघि बढाइरहेको अवस्थामा अर्नमा गाउँपालिकाको यो योजना सिरहाकै महत्वपूर्ण पूर्वाधार योजनामध्ये एकका रूपमा हेरिएको छ।